Sanskathi
Sep 12

நாட்டின் வளர்ச்சிக்கு ஊழல் தான் மிகப்பெரும் தடையாக உள்ளது: கவர்னர்

நாட்டின் வளர்ச்சிக்கு ஊழல் தான் மிகப்பெரும் தடையாக உள்ளது: கவர்னர்

உலக நாடுகளைப் போல் இந்தியா வளராமல் இருப்பதற்கு ஊழல் தான் மிகப்பெரும் காரணமாக இருப்பதாக கவர்னர் பன்வாரிலால் புரோகித் தெரிவித்துள்ளார். 

கோவை பெரியநாயக்கன்பாளையத்தில் உள்ள ராமகிருஷ்ணா மிஷன் வித்யாலயா கல்லூரியில் நேற்று விவகானந்தரின் 150வது சிகாகோ உரை ஆண்டு விழா நடைபெற்றது. இவ்விழாவில் தமிழக கவர்னர் கலந்து கொண்டார். அப்போது அவர் பேசியதாவது: ‘ஊழல் தான் நமது நாட்டின் வளர்ச்சிக்கு பெரும் தடையாக உள்ளது. நாம் நமது அடிமனதில் இருந்து கேட்டால், மற்ற நாடுகளைப் போல் நமது நாடு ஏன் இல்லை என்பது புரிய வரும். நேர்மையான வாழக்கை முறை மூலம் ஊழலை ஒழிக்க முடியும். 

பொறுப்பில் உள்ளவர்கள் எளிமையான வாழ்க்கை முறையை விரும்பினால் ஊழல் மறைந்து விடும். இதையே தான் தனிமனித ஒழுக்கம் என்ற முறையில் விவேகானந்தர் வலியுறுத்தியுள்ளார். விவேகானந்தரால் இந்த உலகமே இந்தியாவை திரும்பி பார்த்தது. பழமைக்கும் புதுமைக்கும், அறிவியலுக்கும் மதத்துக்கும், இளமைக்கும் முதுமைக்கும் பாலமாக இருந்தவர் விவேகானந்தர்’ 

இவ்வாறு அவர் தெரிவித்தார். பின்னர், கல்லூரி சார்பில் நடைபெற்ற பேச்சுப் போட்டியில் வெற்றி பெற்ற இரண்டு மாணவர்களுக்கு கவர்னர் பரிசுகளை வழங்கினார். ஒரு மாணவர் ஆங்கிலத்திலும், மற்றொரு மாணவர் தமிழிலும் பேச்சுப் போட்டியில் பரிசினை பெற்றனர். இதைக் கேட்ட கவர்னர் பன்வாரிலால், தமிழ் மிகவும் தொன்மையான மொழி என்று பெருமை கொண்டார்.