Sanskathi
Nov 09

மெகா கூட்டணிக்காக சென்னை வரும் சந்திரபாபு நாயுடு; கரம் கோர்ப்பாரா ஸ்டாலின்!

மெகா கூட்டணிக்காக சென்னை வரும் சந்திரபாபு நாயுடு; கரம் கோர்ப்பாரா ஸ்டாலின்!

வரும் 2019ஆம் ஆண்டு மக்களவை தேர்தல் நடைபெற உள்ளது. இதனை மத்தியில் ஆளும் பாஜக மிகுந்த நம்பிக்கை உடன் எதிர்கொள்ள தயாராகி வருகிறது. அதேசமயம் எதிர்க்கட்சிகள் பாஜகவை வீழ்த்த வியூகம் வகுத்து வருகின்றன. 

காங்கிரஸ் தலைமையில் மற்றும் மூன்றாவது அணி என கூட்டணிக்கான செயல்பாடுகள் தீவிரமடைந்துள்ளன. இந்நிலையில் ஆந்திர மாநில முதலமைச்சர் சந்திரபாபு நாயுடு பல்வேறு அரசியல் கட்சித் தலைவர்களை சந்தித்து பேசி வருகிறார். 

ஆந்திர மாநிலத்திற்கு சிறப்பு அந்தஸ்து வழங்கும் கோரிக்கையை மத்தியில் ஆளும் பாஜக அரசு கண்டுகொள்ளவில்லை. இதனால் பாஜக கூட்டணியில் இருந்து சந்திரபாபு நாயுடு அதிரடியாக விலகினார். அக்கட்சிக்கு எதிராக வலுவான கூட்டணியை கட்டமைத்து, மக்களவை தேர்தலை எதிர்கொள்ள முயற்சி மேற்கொண்டுள்ளார். 

முன்னதாக டெல்லி சென்ற அவர், காங்கிரஸ் தலைவர் ராகுல் காந்தியை சந்தித்து ஆலோசனை நடத்தினார். மேலும் மார்க்சிஸ்ட் கம்யூனிஸ்ட் பொதுச் செயலாளர் சீதாராம் யெச்சூரி, தேசியவாத காங்கிரஸ் தலைவர் சரத்பவார், தேசிய மாநாட்டு கட்சி தலைவர் பரூக் அப்துல்லா, சமாஜ்வாதி கட்சி தலைவர் முலாயம் சிங் யாதவ் ஆகியோரை சந்தித்து பேசியுள்ளார்.

நேற்று பெங்களூரு சென்று கர்நாடக மாநில முதலமைச்சர் குமாரசாமி மற்றும் மதச்சார்பற்ற ஜனதாதள தலைவர் தேவகவுடாவை சந்தித்தார். இந்நிலையில் இன்று சென்னை வரும் சந்திரபாபு நாயுடு, திமுக தலைவர் மு.க.ஸ்டாலினை சந்திக்கிறார். 

இந்த சந்திப்பு ஆழ்வார்பேட்டையில் ஸ்டாலின் இல்லத்தில் மாலை 6.30 மணிக்கு நடைபெறும் என்று கூறப்படுகிறது. அப்போது பாஜகவிற்கு எதிராக மெகா கூட்டணி அமைக்க திமுகவிற்கு அழைப்பு விடுப்பார் என்று தெரிகிறது.