Sanskathi
Mar 15

பொள்ளாச்சி விவகாரம்: உயர்நீதிமன்ற கண்காணிப்பில் சிபிஐ விசாரணை கோரும் திமுக

பொள்ளாச்சி விவகாரம்: உயர்நீதிமன்ற கண்காணிப்பில் சிபிஐ விசாரணை கோரும் திமுக

பொள்ளாச்சி பாலியல் கொடூரம் குறித்த வழக்கை உயர்நீதிமன்ற கண்காணிப்பில் சிபிஐ விசாரணை நடத்த வேண்டும் என திமுக-வின் மதச்சார்பற்ற முற்போக்குக் கூட்டணி சார்பில் தீர்மானம் நிறைவேற்றப்பட்டுள்ளது. 

சென்னை அண்ணா அறிவாலயத்தில் செய்தியாளர்களை சந்தித்த மு.க. ஸ்டாலின், மக்களவைத் தேர்தலுக்காக திமுக உள்ளிட்ட கூட்டணி கட்சிகள் போட்டியிடும் தொகுதிகளை அறிவித்தார். 

அதற்கு முன்னதாக அவர் பேசும் போது, பொள்ளாச்சி பாலியல் வன்முறை தொடர்பாக உயர் நீதிமன்ற நீதிபதி கண்காணிப்பில் சிபிஐ விசாரணை நடத்த வேண்டும் என்ற தீர்மானம் மதச்சார்பற்ற முற்போக்குக் கூட்டணி சார்பில் நிறைவேற்றப்பட்டதாக தெரிவித்தார். 

இதுதொடர்பாக திமுக வெளியிட்டுள்ள அறிக்கையில், தமிழகத்தை உலுக்கியுள்ள பொள்ளாச்சி பாலியல் வன்கொடுமை வழக்கில் தொடர்புடைய குற்றவாளிகள் அனைவரும் கைது செய்யப்பட்டு விசாரணை நடைபெற்றால் தான் முழுமையான நீதி கிடைக்கும்.

புகார் அளித்த பெண்ணின் பெயரை அரசாணையில் வெளியிட்ட தமிழக அரசின் செயல் கண்டிக்கத்தக்கது. இதற்கு எதிராக மேற்கொள்ளப்படும் போராட்டங்களுக்கு காவல்துறை அனுமதி மறுக்கிறது. மேலும், இந்த விவகாரம் தொடர்பாக தகவல்களை சமூகவலைதளங்களில் வெளியிடுவோர் மீதும் தாக்குதலை நடத்துகிறது. 

நக்கீரன் இதழின் ஆசிரியர் ’நக்கீரன்’ கோபால் மீது காவல்துறையிலிருந்து சம்மன் அனுப்பப்பட்டிருப்பது கருத்துரிமையை நசுக்குகின்ற நடவடிக்கையாகும். பாலியல் வன்கொடுமை விவகாரத்தில் உண்மை மறைப்பதற்கான முயற்சிகள் நடக்கின்றன. 

இந்த விவகாரத்தில் நீதி நிலைநாட்டப்பட வேண்டும் என்றால், உயர்நீதிமன்ற கண்காணிப்பின் கீழ் சிபிஐ விசாரனை நடத்தப்பட வேண்டும். சிலை கடத்தல் வழக்கில் நீதிமன்றம் காட்டும் சிறப்பு கவனத்தை இந்த வழக்கிற்கும் ஏற்படுத்தப்பட வேண்டும் என குறிப்பிடப்பட்டுள்ளது.