Sanskathi
May 14

விடுதலைப் புலிகள் மீதான தடையை நீட்டித்தது சட்டவிரோதம் – வைகோ குற்றச்சாட்டு

விடுதலைப் புலிகள் மீதான தடையை நீட்டித்தது சட்டவிரோதம் – வைகோ குற்றச்சாட்டு

கோட்சே குறித்த கமல்ஹாசனின் கருத்தில் எந்தவித தவறும் இல்லை. கோட்சேவை தெய்வமாக கொண்டாடுவோம் என்று கூறியுள்ள சங்பரிவார் மீது பிரதமர் மோடி என்ன நடவடிக்கை எடுத்துள்ளார் என்று மதிமுக பொதுச் செயலாளா் வைகோ கேள்வி எழுப்பி உள்ளாா். 

புதுக்கோட்டையில் நிகழ்ச்சி ஒன்றில் கலந்து கொண்ட பின் மதிமுக பொதுச் செயலாளர் வைகோ செய்தியாளர்களை சந்தித்தாா். அப்போது அவா் பேசுகையில், தற்போது நடைபெறும் மக்களவைத் தேர்தலில் தமிழகம் மற்றும் புதுச்சேரியில் உள்ள 39 தொகுதிகளில் திமுக கூட்டணி அமோக வெற்றி பெறும். அதே போன்று 22 சட்டமன்ற தொகுதி இடைத் தேர்தலிலும் திமுக வெற்றி பெறுவது உறுதி. தமிழகத்தில் திமுக கூட்டணிக்கான அலை வீசத் தொடங்கிவிட்டது. 

மே 23ம் தேதிக்குப் பிறகு மத்தியிலும், மாநிலத்திலும் மிகப்பெரிய அரசியல் மாற்றம் ஏற்பட உள்ளது. தமிழகத்தில் திமுக தலைமையிலான ஆட்சி அமைவதற்கு அறிகுறிகள் தெரியத் தொடங்கிவிட்டது. விடுதலைப் புலிகளுக்கான தடையை மேலும் 5 ஆண்டுகாலம் மத்திய அரசு நீட்டித்துள்ளது அடிப்படை ஆதாரமற்றது. இது சட்டவிரோதமான தடை. இதை வாடிக்கையாக மத்திய அரசு செய்து கொண்டு வருகிறது. 

தேர்தல் ஆணையம் மத்திய அரசின் கைப்பாவையாக செயல்பட்டு வருகிறது. அதன் வெளிப்பாடுதான் தூத்துக்குடியில் ஸ்டாலின் தங்கியுள்ள தனியார் விடுதியில் தேர்தல் பறக்கும் படையினர் சோதனையில் ஈடுபட்டுள்ளனர். இது எதிர்க்கட்சியினரை அச்சுறுத்த மாநில அரசு செய்துள்ளது.நடிகர் கமலஹாசன் கோட்சே குறித்த தெரிவித்த கருத்து தவறானதல்ல. கோட்சேவை தெய்வமாக கொண்டாடுவோம் என்று கூறியுள்ள சங்பரிவார் மீது பிரதமர் மோடி என்ன நடவடிக்கை எடுத்துள்ளார். சங்பரிவார், இந்துத்துவா உள்ளிட்ட அமைப்புகள் மத கலவரத்தை தூண்டிவிட்டு குளிர்காய நினைக்கின்றது. 

தெலங்கானா முதல்வர் சந்திரசேகர ராவ் நேற்று திமுக தலைவர் ஸ்டாலினை சந்தித்துள்ளார். இதனால் எந்த அரசியல் மாற்றமும் ஏற்படப் போவதில்லை. திமுக தன்னுடைய நிலைப்பாட்டை தெளிவாக அவரிடம் எடுத்துக் கூறி விட்டது. காங்கிரஸ் தலைமையிலான மாநில கட்சிகள் தான் ஆட்சியமைக்கும் என்ற திமுக நிலைபாட்டில் எந்தவிதமான மாற்றமும் இல்லை. 

7 பேர் விடுதலையில் தொடர்ந்து ஆளுநர் தவறு செய்து வருகிறார். சட்டவிரோதமாக ஆளுநர் செயல்பட்டு வருகிறார் என்று அவர் தெரிவித்துள்ளாா்.