தடை செய்யப்பட்ட பொருட்கள் விற்பனை: ஷீன் (Shein) செயலிக்கு ஆப்பு வைக்குமா பிரான்ஸ்?
பிரபல சீன விற்பனை நிறுவனமான ஷீன் (Shein), இப்போது பிரான்சில் ஒரு மிகப் பெரிய சட்டச் சிக்கலில் சிக்கியுள்ளது.
தடை செய்யப்பட்ட பொருட்கள் விற்பனை: ஷீன் (Shein) செயலிக்கு ஆப்பு வைக்குமா பிரான்ஸ்?
பிரபல சீன விற்பனை நிறுவனமான ஷீன் (Shein), இப்போது பிரான்சில் ஒரு மிகப் பெரிய சட்டச் சிக்கலில் சிக்கியுள்ளது. அந்த நிறுவனத்தின் ஒன்லைன் தளத்தை (platform) பிரான்சில் முற்றிலுமாக முடக்க வேண்டும் என்று பிரெஞ்சு அரசாங்கம் கோரிக்கை விடுத்துள்ளது. இந்தப் பரபரப்பான வழக்கு, வரும் நவம்பர் 26 ஆம் திகதி பாரிஸ் நீதிமன்றத்தில் விசாரணைக்கு வருகிறது.
இந்த விவகாரத்தின் பின்னணி மிகவும் அதிர்ச்சிகரமானது. ஷீன் தளத்தில், குழந்தைகளைப் பாலியல் ரீதியாகச் சித்தரிக்கும் பொம்மைகள் (pedopornographic dolls) மற்றும் மிக ஆபத்தான 'பிரிவு A' (Category A) ஆயுதங்கள் விற்கப்பட்டது கண்டுபிடிக்கப்பட்டது.
இதைக் கண்டு கொந்தளித்த பிரெஞ்சு பிரதமர் செபாஸ்டியன் லெகோர்னு, நவம்பர் 5 ஆம் திகதி ஷீன் நிறுவனத்திற்கு 48 மணி நேர கெடு விதித்தார். அந்தச் சட்டவிரோத பொருட்களை உடனடியாக நீக்க வேண்டும் எனக் கடுமையாக உத்தரவிட்டார்.
அவரின் உத்தரவுக்குப் பணிந்து, நவம்பர் 7 ஆம் திகதிக்குள் ஷீன் அந்தப் பொருட்களைத் தனது தளத்திலிருந்து அகற்றிவிட்டது. இத்துடன் பிரச்சனை முடிந்தது என்று அனைவரும் நினைத்தனர்.
ஆனால், அங்கேதான் ஒரு பெரிய திருப்பம்! பொருட்களை நீக்கியபிறகும், ஷீன் தளத்தை இடைநீக்கம் செய்யும் சட்ட நடவடிக்கையைக் கைவிடப் போவதில்லை என்று பிரதமர் லெகோர்னு திட்டவட்டமாக அறிவித்துவிட்டார்.
இதற்கு உள்துறை அமைச்சகம் கூறிய காரணம்: "ஷீன் நிறுவனத்தின் தொடர்ச்சியான மற்றும் பலகீனமான தவறுகளால், நாட்டின் பொது ஒழுங்கிற்கு கடுமையான பாதிப்பு" ஏற்பட்டுள்ளது. அதாவது, ஒருமுறை தவறு செய்து திருத்திக் கொண்டாலும், மீண்டும் மீண்டும் இதுபோல நடப்பதை அனுமதிக்க முடியாது என்பதில் பிரெஞ்சு அரசாங்கம் உறுதியாக உள்ளது.
பிரான்சில் தனது முதல் நேரடி கடையை (physical store) நவம்பர் 5 ஆம் திகதி ஷீன் திறந்த சமயத்தில், இந்த மெகா ஊழல் வெடித்துள்ளது குறிப்பிடத்தக்கது. இது ஷீன் நிறுவனத்திற்கு பெரும் பின்னடைவாகவும், தர்மசங்கடமாகவும் அமைந்துள்ளது.
நவம்பர் 26 அன்று நீதிமன்றம் என்ன தீர்ப்பு சொல்லப் போகிறது என்பதை பிரான்ஸ் மட்டுமல்லாமல், உலகெங்கிலும் உள்ள ஷீன் வாடிக்கையாளர்கள் உன்னிப்பாகக் கவனித்து வருகின்றனர்.
