விமல் வீரவன்ச மற்றும் 35 பேர் அடங்கிய குழுவினருக்கு எதிராக சட்ட நடவடிக்கை!
அனுமதியின்றி நுழைந்த விமல் வீரவன்சவின் குழுவினரை நினைவுத் தூபி வளாகத்திற்குள் நுழைய விடாமல் தடுத்து நிறுத்தியது பொலிஸ்.
முன்னாள் நாடாளுமன்ற உறுப்பினர் விமல் வீரவன்ச மற்றும் அவருடன் வந்த சுமார் 35 பேர் அடங்கிய குழுவினருக்கு எதிராக சட்ட நடவடிக்கை எடுக்கப்படவுள்ளதாக பொலிஸ் தலைமையகம் அறிவித்துள்ளது. பத்தரமுல்லையிலுள்ள ரணவிரு நினைவுத் தூபிக்கு அருகில் நேற்று (18) இடம்பெற்ற மோதல் சம்பவத்தை அடுத்தே இந்தத் தீர்மானம் எட்டப்பட்டுள்ளது.தேசிய ரணவிரு தின (National War Heroes Day) நினைவேந்தல் நிகழ்விற்கான ஒத்திகையின் போது ஏற்பட்ட இடையூறுகள் காரணமாகவே இந்த நடவடிக்கை எடுக்கப்படவுள்ளதாக பொலிஸ் ஊடகப் பிரிவு விடுத்துள்ள அறிக்கையில் தெரிவிக்கப்பட்டுள்ளது.
இன்று (மே 19) ஜனாதிபதி அநுர குமார திஸாநாயக்கவின் தலைமையில் நாடாளுமன்ற மைதானத்திற்கு அருகிலுள்ள ரணவிரு நினைவுத் தூபியில் தேசிய ரணவிரு தின நிகழ்வு நடத்தப்படவுள்ளது. இதற்கான பாதுகாப்பு மற்றும் ஏற்பாட்டு ஒத்திகைகள் நேற்று பாதுகாப்புப் படையினரால் முன்னெடுக்கப்பட்டு வந்தன.இதன்போது, உரிய அனுமதியின்றி முன்னாள் நாடாளுமன்ற உறுப்பினர் விமல் வீரவன்ச தலைமையிலான குழுவினர் நினைவுத் தூபி வளாகத்திற்குள் பலவந்தமாக நுழைய முற்பட்டுள்ளதாக பொலிஸார் தெரிவித்துள்ளனர்.
அனுமதியின்றி நுழைந்த இக்குழுவினரின் செயற்பாடுகள் காரணமாக, அங்கு பாதுகாப்பு மற்றும் ஒழுங்கமைப்புப் பணிகளில் ஈடுபட்டிருந்த அதிகாரிகளின் கடமைகளுக்குப் பெரும் தடை ஏற்பட்டதாக பொலிஸ் ஊடகப் பிரிவு குறிப்பிட்டுள்ளது.இதனை அடுத்து, அங்கு கடமையில் இருந்த பொலிஸ் அதிகாரிகள் விமல் வீரவன்சவின் குழுவினரை நினைவுத் தூபி வளாகத்திற்குள் நுழைய விடாமல் தடுத்து நிறுத்தியதுடன், அவர்களை அப்பகுதியில் இருந்து பாதுகாப்பாக வெளியேற்றினர்.
அரச அதிகாரிகளின் கடமைகளுக்கு இடையூறு விளைவித்தமை மற்றும் ஒத்திகை நடவடிக்கைகளைத் தடுத்தமை ஆகிய குற்றச்சாட்டுகளின் கீழ் விமல் வீரவன்ச மற்றும் அவருடன் இருந்த குழுவினருக்கு எதிராக நீதிமன்றத்தின் ஊடாக சட்ட நடவடிக்கைகள் தொடரப்படவுள்ளதாக பொலிஸார் தெரிவித்துள்ளனர்.
