கனடாவின் பொதுப் பாதுகாப்பு அமைச்சராக உள்ள ஈழத் தமிழருக்கு எதிராக எழுந்துள்ள குற்றச்சாட்டு!
விடுதலைப் புலி உறுப்பினரான செந்தூரன் செல்வகுமார் என்பவருக்கு கனேடிய குடியுரிமை வழங்குவதை ஆதரித்தார் கெரி ஆனந்தசங்கரி.
கனடாவின் பொதுப் பாதுகாப்பு அமைச்சராக உள்ள ஈழத் தமிழரான கெரி ஆனந்தசங்கரிக்கு எதிராக அந்நாட்டு அரசாங்கம் குற்றச்சாட்டை முன்வைத்துள்ளது.
இலங்கையின் முன்னாள் விடுதலைப் புலி உறுப்பினரான செந்தூரன் செல்வகுமார் என்பவருக்கு கனேடிய குடியுரிமை வழங்குவதை ஆதரித்து, 2016 மற்றும் 2023 ஆம் ஆண்டுகளில் கனடா எல்லை சேவைகள் நிறுவனத்திற்கு கெரி ஆனந்தசங்கரி இரண்டு கடிதங்களை அனுப்பியுள்ளதாக தெரிவிக்கப்படுகின்றது.
கனடாவில் விடுதலைப் புலிகள் இயக்கம் தடைசெய்யப்பட்ட அமைப்பு என்பதால், கெரி ஆனந்தசங்கரி பயங்கரவாதத்தை ஆதரிப்பதாக அவர் மீது குற்றச்சாட்டுக்கள் எழுந்துள்ளன.
கனடாவின் பொதுப் பாதுகாப்பு அமைச்சரான கேரி ஆனந்தசங்கரி, நாடாளுமன்ற உறுப்பினராகப் பணியாற்றியபோது இந்தக் கடிதங்களைச் சமர்ப்பித்ததாகக் கூறப்படுகிறது.
செந்தூரன் செல்வகுமாருக்கு விடுதலைப் புலிகளுடன் நேரடித் தொடர்புகள் இருப்பதாகக் கூறி குடிவரவு, அகதிகள் மற்றும் குடியுரிமை கனடா (IRCC) பல சந்தர்ப்பங்களில் அவரது குடியுரிமை விண்ணப்பத்தை நிராகரித்துள்ளது.
அந்தக் கடிதங்களில், குடும்பப் பிரிவு குறித்த கவலைகளைக் குறிப்பிட்டு, மனிதாபிமான அடிப்படையில் செல்வகுமாருக்கு கனேடிய குடியுரிமை வழங்க நடவடிக்கை எடுக்கப்பட வேண்டும் என்று ஆனந்தசங்கரி கோரியதாகக் கூறப்படுகிறது.
எனினும் ஆனந்தசங்கரி மீதான குற்றச்சாட்டுகள், விடுதலைப் புலிகள் ஒரு தடைசெய்யப்பட்ட பயங்கரவாத அமைப்பு என்பதால், அவரது நடவடிக்கைகள் பயங்கரவாதத்தை ஆதரிப்பதாகச் சொல்கின்றன.
மேலும் பயங்கரவாத அமைப்புக்கு ஆதரவளிப்பதாகக் கூறப்படும் இந்தக் குற்றச்சாட்டுகளைக் கருத்தில் கொண்டு, பொதுப் பாதுகாப்பு அமைச்சராக கேரி ஆனந்தசங்கரி தொடர்ந்து பணியாற்றுவது சிக்கலாக இருப்பதாக கனடா பிரதமருக்குத் தெரிவிக்கப்பட்டுள்ளது.
இதற்கு பதிலளிக்கும் விதமாக, பொது பாதுகாப்பு அமைச்சர் கேரி ஆனந்தசங்கரியின் அலுவலகம் அறிக்கை ஒன்றை வெளியிட்டது.
குறித்த அறிக்கையில், இந்த வழக்கு நீதிமன்றத்தின் முன் இருக்கும்போது விரிவாக கருத்து தெரிவிப்பது பொருத்தமற்றது என்று தெரிவித்துள்ளது.
மேலும் அமைச்சரானதிலிருந்து இதுபோன்ற ஆதரவு கடிதங்களை தான் சமர்ப்பிக்கவில்லை என்று ஆனந்தசங்கரி வலியுறுத்தினார்.
தனது முந்தைய ஆதரவு மனிதாபிமான அடிப்படையில் அமைந்ததாகவும், கனடாவில் பிறந்த குழந்தையுடன் ஒரு குடும்பம் பிரிவதைத் தடுப்பதை நோக்கமாகக் கொண்டதாகவும் அவர் கூறினார்.
மேலும் எந்தவொரு பயங்கரவாத அமைப்பையும் தான் ஒருபோதும் ஆதரித்ததில்லை என்றும், அதற்கு ஆதரவாக முடிவுகளை எடுக்க மாட்டேன் என்றும் அவர் வலியுறுத்தியுள்ளமை குறிப்பிடத்தக்கது.
