பிரான்சில் போக்குவரத்து சோதனையில் 691 வெளிநாட்டவர் கைது: பாதிக்கும் மேல் விடுதலை!
அரசின் நடவடிக்கைக்கு கடும் கண்டனம்!
பிரான்சில் போக்குவரத்து சோதனையில் 691 வெளிநாட்டவர் கைது: பாதிக்கும் மேல் விடுதலை - அரசின் நடவடிக்கைக்கு கடும் கண்டனம்
பாரிஸ்: பிரான்சின் உள்துறை அமைச்சர் புருனோ ரெட்டையோ (Bruno Retailleau) உத்தரவின் பேரில், கடந்த வாரம் நாடு தழுவிய அளவில் போக்குவரத்து முனையங்களில் நடத்தப்பட்ட தீவிர சோதனையின் போது, சட்டவிரோத நிலையில் இருந்த 691 வெளிநாட்டவர்கள் கைது செய்யப்பட்டதாக இன்ஃபோமைக்ரான்ட்ஸ் (InfoMigrants) செய்தி நிறுவனத்திற்கு உள்துறை அமைச்சகம் தகவல் அளித்துள்ளது.
இருப்பினும், கைது செய்யப்பட்டவர்களில் சுமார் 100 பேர் மட்டுமே உடனடியாக எல்லைக்குத் திருப்பியனுப்பப்பட்டனர் அல்லது நாடு கடத்தும் நோக்கில் தடுப்புக் காவலில் வைக்கப்பட்டனர். மீதமுள்ள 500-க்கும் மேற்பட்டோர் பல்வேறு காரணங்களுக்காக விடுவிக்கப்பட்டுள்ளனர். இந்த நடவடிக்கைக்கு மனித உரிமை சங்கங்கள் மற்றும் தொழிற்சங்கங்கள் கடும் கண்டனம் தெரிவித்துள்ளன.
தீவிர சோதனை நடவடிக்கை
ஜூன் 18 மற்றும் 19 ஆகிய திகதிகளில், 48 மணி நேரம் நீடித்த இந்த நடவடிக்கையில், "சட்டவிரோத குடியேறிகளைக் கைது செய்வதற்காக" 4,000-க்கும் மேற்பட்ட , காவல்துறையினர், ஈடுபடுத்தப்பட்டதாக அமைச்சர் புருனோ ரெட்டையோ தெரிவித்திருந்தார்.
பிரான்சின் முக்கிய தொடருந்து நிலையங்கள், அண்டை நாடுகளுக்குச் செல்லும் தொடருந்துகள் மற்றும் எல்லைப் பகுதிகளில் உள்ள பிராந்திய தொடருந்துகள் ஆகியவற்றில் சோதனைகள் தீவிரப்படுத்தப்பட்டன. இந்த இரண்டு நாட்களில் மட்டும், மொத்தம் 844 தொடருந்து நிலையங்கள் மற்றும் 1,273 தொடருந்துகள் சோதனைக்கு உட்படுத்தப்பட்டதாக உள்துறை அமைச்சகம் குறிப்பிட்டுள்ளது.
கைது மற்றும் அதன் முடிவுகள்
கைது செய்யப்பட்ட 691 நபர்களின் நிலைகுறித்த விவரங்கள், இந்த நடவடிக்கையின் உண்மையான தாக்கத்தை வெளிப்படுத்துகின்றன:
எல்லைக்குத் திருப்பியனுப்பப்பட்டவர்கள்: சுமார் 100 பேர். இவர்கள் பெரும்பாலும் இத்தாலி மற்றும் ஸ்பெயின் எல்லைப் பகுதிகளில் கைது செய்யப்பட்டு, இருதரப்பு ஒப்பந்தங்களின் கீழ் உடனடியாக அந்த நாடுகளுக்குத் திருப்பி அனுப்பப்பட்டனர். (இந்த உடனடித் திருப்பி அனுப்பும் நடைமுறை, பிரான்சின் அரசமைப்பு கவுன்சிலால் (Conseil d'État) பிப்ரவரி 2024 இல் சட்டவிரோதமானது எனத் தீர்ப்பளிக்கப்பட்டது குறிப்பிடத்தக்கது).
நிர்வாகத் தடுப்புக் காவலில் (CRA) வைக்கப்பட்டவர்கள்: சுமார் 30 பேர். இவர்கள் நாடு கடத்தப்படும் வரை தடுப்பு மையங்களில் வைக்கப்படுவார்கள்.
நாடு கடத்தல் உத்தரவு (OQTF) பெற்றவர்கள்: சுமார் 200 பேர். இவர்களுக்கு "பிரெஞ்சு மண்ணை விட்டு வெளியேற வேண்டும் என்ற உத்தரவு" (OQTF) வழங்கப்பட்டுள்ளது. இவர்கள் 30 நாட்களுக்குள் தன்னிச்சையாக நாட்டை விட்டு வெளியேற வேண்டும்.
மேற்கண்டவர்களைத் தவிர, மீதமுள்ள 500-க்கும் மேற்பட்டோர் விடுவிக்கப்பட்டுள்ளனர். அவர்களில் சிலருக்கு வீட்டுக் காவலில் இருக்க உத்தரவிடப்பட்டுள்ளது.
"வெளிநாட்டவர் விரோத நடவடிக்கை" எனக் கடும் கண்டனம்
பல்வேறு தொழிற்சங்கங்கள் மற்றும் இனவெறிக்கு எதிரான MRAP இயக்கம் ஆகியவை இந்த நடவடிக்கையை "மிகவும் நலிவடைந்த நிலையில் உள்ளவர்களைப் பலிகடாவாக்கும் ஒரு வெளிநாட்டவர் விரோத நடவடிக்கை" என்று கடுமையாகச் சாடியுள்ளன.
இந்தச் சோதனைகள், மக்களை அச்சுறுத்தும் "திடீர் கைது நடவடிக்கைகளை (rafles)" ஒத்திருப்பதாகக் கூறிய அவர்கள், "வேலைக்குச் செல்லும் தொழிலாளர்கள், வழக்கத்தைவிட அதிக அச்சத்துடன் பயணிக்க வேண்டிய நிலையை இந்த நடவடிக்கை உருவாக்கியுள்ளது" என்று கண்டனம் தெரிவித்தனர்.
மேலும், பல தன்னார்வத் தொண்டு நிறுவனங்கள், சட்டவிரோத நிலையில் உள்ளவர்கள் இந்த இரண்டு நாட்களும் வெளியே வர வேண்டாம் என்று அறிவுறுத்தியிருந்தன.
Utopia 56 என்ற சங்கம் தனது X தளத்தில், "உள்துறை அமைச்சகத்தின் இந்தத் திடீர் கைதுப் பிரச்சாரம் முடிவுக்கு வந்துவிட்டது. அச்சத்தைப் பரப்புவதற்கும், சுய விளம்பரத்திற்கும் பல மில்லியன் யூரோக்கள் மக்கள் பணம் வீணடிக்கப்பட்டுள்ளது," என்று விமர்சித்துள்ளது.
சிவா சின்னபொடி
