வாகனத் திருடர்கள் எனச் சந்தேகிக்கப்பட்ட இருவர் , மூன்று காவலர்களை கொடூரமாகத் தாக்கிவிட்டு தப்பியோட்டம்!
நாடு கடத்த உத்தரவிடப்பட்டவர் உட்பட இருவர் கைது!
பாரிஸில் போலீசாரைத் தாக்கிவிட்டு தப்பியோட்டம் - நாடு கடத்த உத்தரவிடப்பட்டவர் உட்பட இருவர் கைது!
பாரிஸ்: பிரான்ஸ் தலைநகர் பாரிஸில், வாகனத் திருடர்கள் எனச் சந்தேகிக்கப்பட்ட இருவரைப் பிடிக்க முயன்றபோது, மூன்று காவலர்கள் கொடூரமாகத் தாக்கப்பட்ட சம்பவம் பெரும் பரபரப்பை ஏற்படுத்தியுள்ளது. தப்பியோடிய குற்றவாளிகள் இருவரையும் போலீசார் சிறிது நேரத்திலேயே மடக்கிப் பிடித்தனர். அவர்களில் ஒருவர், நாட்டை விட்டு வெளியேற உத்தரவிடப்பட்டவர் (OQTF) என்பது விசாரணையில் தெரியவந்துள்ளது.
நேற்று முன்தினம் (புதன்கிழமை, ஆகஸ்ட் 20) இரவு சுமார் 11:30 மணியளவில், பாரிஸின் 17வது நிர்வாகப்பகுதியில் இந்தச் சம்பவம் நிகழ்ந்துள்ளது. வாகனங்களில் திருட்டு மற்றும் சேதப்படுத்தும் செயல்களில் ஈடுபட்டு வந்த இரு நபர்களை, குற்றத் தடுப்புப் பிரிவைச் (BAC) சேர்ந்த நான்கு காவலர்கள் சாதாரண உடையில் பின்தொடர்ந்துள்ளனர்.
சந்தேக நபர்களைப் பிடித்து விசாரணை நடத்த முயன்றபோது, நிலைமை கைமீறிப் போனது. குற்றவாளிகளில் ஒருவன், திடீரென மறைத்து வைத்திருந்த கூர்மையான பொருளால் ஒரு காவலரின் காதில் வெட்டியுள்ளான். மற்றொரு காவலரின் தாடையில் பலமாகக் குத்தியுள்ளான். மேலும், அவனது கூட்டாளியைப் பிடிக்க முயன்ற மூன்றாவது காவலரின் முதுகில் சரமாரியாகத் தாக்கியுள்ளான்.
காவலர்களைத் தாக்கியபிறகு, குற்றவாளிகள் இருவரும் சம்பவ இடத்திலிருந்து தப்பியோடினர். உடனடியாகக் கூடுதல் படையினர் வரவழைக்கப்பட்டு, அப்பகுதி முழுவதும் தேடுதல் வேட்டை தீவிரப்படுத்தப்பட்டது. சில நிமிடங்களிலேயே, தப்பியோடிய இருவரும் அருகில் உள்ள பகுதிகளில் வைத்துக் கைது செய்யப்பட்டனர்.
முக்கிய குற்றவாளி கிளிச்சி (Clichy) பகுதியிலும், அவனது கூட்டாளி 17வது வட்டாரத்தில் உள்ள குவர்சன்ட் சாலையிலும் வைத்து மடக்கிப் பிடிக்கப்பட்டனர்.
விசாரணையில், தாக்குதலுக்கு மூல காரணமானவன், 1991-ல் மொராக்கோவின் காசாபிளாங்காவில் பிறந்த இளைஞன் என்பது தெரியவந்துள்ளது. மேலும், அவன்மீது ஏற்கெனவே பிரான்ஸ் நாட்டை விட்டு வெளியேற வேண்டும் என்ற உத்தரவு (OQTF) பிறப்பிக்கப்பட்டிருந்தது குறிப்பிடத்தக்கது. அவனது கூட்டாளி, 2007-ல் அல்ஜீரியாவில் பிறந்த சிறுவன் என அடையாளம் காணப்பட்டுள்ளது.
இந்தச் சம்பவம்குறித்து, "அரசு அதிகாரிகள்மீது கொலை முயற்சி" என்ற பிரிவின் கீழ் வழக்குப்பதிவு செய்யப்பட்டுள்ளதாகப் பாரிஸ் அரசு வழக்கறிஞர் அலுவலகம் உறுதி செய்துள்ளது.
