எதிர்க்கட்சிகள் ஆளும் மாநிலங்களுக்கு நிதி ஒதுக்கீட்டில் மத்திய அரசு அப்பட்டமான பாரபட்சம்! பிரகாஷ் காரத் குற்றச்சாட்டு!
கம்யூனிஸ்ட் இயக்கத்தின் வரலாற்றை ஒருங்கிணைக்கும் மதுரையில் இந்த மாநாடு.
எதிர்க்கட்சிகள் ஆளும் மாநிலங்களுக்கு நிதி ஒதுக்கீடு செய்வதில் மத்திய அரசு பாரபட்சம் காட்டுவதாக மார்க்சிஸ்ட் கம்யூனிஸ்ட் கட்சியின் ஒருங்கிணைப்பாளர் பிரகாஷ் காரத் குற்றம்சாட்டியுள்ளார்.
மார்க்சிஸ்ட் கம்யூனிஸ்ட் கட்சியின் அகில இந்திய மாநாடு மதுரையில் இன்று தொடங்கியது. இந்த மாநாடு இன்று முதல் 5 நாட்களுக்கு நடைபெறவுள்ளது. இதற்கு முன்னர் கடந்த 1953-ம் ஆண்டு மற்றும் 1972-ம் ஆண்டுகளில் மதுரையில் அகில இந்திய மாநாடு நடத்தப்பட்டது. இந்த மாநாட்டில் அகில இந்திய அளவில் கட்சியின் பிரதிநிதிகள், முக்கிய தலைவர்கள் கலந்து கொண்டுள்ளனர். கேரள முதல்வர் பினராயி விஜயன், கட்சியின் மூத்த தலைவர்கள் பிரகாஷ் காரத், பிருந்தா காரத் உள்ளிட்டோர் கலந்து கொண்டுள்ளனர்.
மாநாட்டின் தொடக்கமாக மேளதாள வாத்தியங்கள் முழங்க கட்சி கொடி ஏற்றப்பட்டது. இதையடுத்து வரலாற்று கண்காட்சி, புத்தக கண்காட்சி, கலை இலக்கிய நிகழ்ச்சிகள் நடைபெற்றன. கட்சியின் தியாகிகளை கவுரவிக்கும் வகையில் நினைவுச்சுடர் ஏற்றப்பட்டது. வெண்மணி தியாகிகள் நினைவு செங்கொடியை மத்திய குழு உறுப்பினர் உ.வாசுகி வழங்கினார். கட்சியின் மத்திய கட்டுப்பாட்டு குழு தலைவர் ஏ.கே.பத்மநாபன் கொடியை பெற்றுக் கொள்ள, மூத்த தலைவர் பிமன் பாசு அதனை ஏற்றி வைத்தார். பின்னர் பிரதிநிதிகள் மாநாடு, பொது மாநாடு தொடங்கியது.
இதில் கட்சியின் ஒருங்கிணைப்பாளர் பிரகாஷ் காரத் பேசியதாவது:
கம்யூனிஸ்ட் இயக்கத்தின் வரலாற்றை ஒருங்கிணைக்கும் மதுரையில் இந்த மாநாட்டை நடத்துவது பொருத்தமானது. கம்யூனிஸ்ட் இயக்கத்தின் தலைசிறந்த தலைவர்களான பி.ராமமூர்த்தி, கே.டி.கே.தங்கமணி, என்.சங்கரய்யா, கே.பி.ஜானகி அம்மாள் ஆகியோரை நினைவு கூர்வோம். இவர்கள் அனைவரும் மதுரையிலும் தமிழகத்திலும் கம்யூனிஸ்ட் கட்சியின் வளர்ச்சிக்கு தனித்துவமான பங்களிப்பை வழங்கினர்.
இந்த கட்சி மாநாடு ஒரு கடினமான தருணத்தில் நடைபெறுகிறது. கட்சியின் பொதுச்செயலாளர் தோழர் சீதாராம் யெச்சூரி தலைமையில் கட்சியின் அகில இந்திய மாநாட்டுக்கான ஏற்பாடுகள் தொடங்கின. ஆனால், இப்போது நம்முடன் அவர் இல்லை. மார்க்சியத்தின் கோட்பாடு மற்றும் நடைமுறையில் தோழர் சீதாராமின் தனித்துவமான பங்களிப்பை என்றென்றும் போற்றுவோம்.
அரசியல் நிலைப்பாட்டை உருவாக்க வேண்டும்
கட்சியின் அகில இந்திய மாநாட்டின் முக்கிய வேலை ஒரு அரசியல் நிலைபாட்டை உருவாக்குவதாகும். இது கட்சியின் அரசியல் பணிக்கான திசையை அமைக்கும். இதற்கு, இன்றைய அரசியல் சூழ்நிலையின் சாராம்சம், அரசு மற்றும் ஆளும் கட்சியின் வர்க்க இயல்பு, நிலவும் வர்க்க சக்திகளின் சமநிலை ஆகியவற்றை சரியாகப் புரிந்து கொள்வது அவசியம். இந்த பயிற்சி சில நேரங்களில் சிக்கலானதாக இருக்கலாம். ஆனால், தற்போதைய தருணத்தில், இது ஒப்பீட்டளவில் எளிமையானது.
மூன்று கேள்விகளைக் கேளுங்கள்!
(i) டொனால்ட் ட்ரம்பின் நண்பர் என்று கூறுவது யார்?
(ii) கௌதம் அதானி மற்றும் முகேஷ் அம்பானியின் நெருங்கிய நண்பர் யார்?
(iii) ஆர்எஸ்எஸ்ஸுக்கு யார் முழு விசுவாசம்?
இந்த மூன்று கேள்விகளுக்கும் ஒரே பதில் நரேந்திர மோடியும் பாஜகவும் தான்.
பிரதமர் நரேந்திர மோடியும் அவரது அரசும் அமெரிக்க ஏகாதிபத்தியத்துடன் நெருக்கமாக இணைந்து இந்துத்துவா-கார்ப்பரேட் உறவை பிரதிநிதித்துவப்படுத்துகின்றனர். பாஜக - ஆர்எஸ்எஸ் மற்றும் இந்துத்துவா-கார்ப்பரேட்டை தோற்கடிக்க போராட வேண்டும்.பாஜக - ஆர்எஸ்எஸ் கூட்டணியை எவ்வாறு திறம்பட எதிர்த்துப் போராடுவது என்ற சிக்கலான கேள்வி எழுகிறது.
இந்துத்துவா சக்திகளின் அரசியல் ஆதிக்கம்
இன்று இந்துத்துவா சக்திகளால் நடைமுறைப்படுத்தப்படும் அரசியல் ஆதிக்கம் என்பது வெறும் தேர்தல் வழிமுறைகளால் மட்டும் அல்ல என்பதை நாம் அறிவோம். கருத்தியல், கலாச்சாரம் மற்றும் சமூகத் துறைகளில் இந்துத்துவா சக்திகள் செலுத்தும் செல்வாக்கின் மூலம் பெறப்பட்ட ஆதிக்கம் இது. இது ஜனநாயகம் மற்றும் அரசியலமைப்பு மீதான எதேச்சாதிகார தாக்குதல்கள் மூலம் செயல்படுத்தப்படும் ஆதிக்கம்.
மார்க்சிஸ்ட் கட்சியும் இடதுசாரிகளும் மக்களின் வாழ்வாதாரத்தைப் பாதுகாக்கவும், புதிய தாராளமயக் கொள்கைகளின் தாக்குதல்களுக்கு எதிராகவும் பல போராட்டங்களை நடத்தி வருகிறது. இந்துத்துவா வகுப்புவாதத்திற்கு எதிரான போராட்டத்தையும், புதிய தாராளமயக் கொள்கைகளுக்கு எதிரான போராட்டத்தையும் ஒருங்கிணைக்க அழைப்பு விடுக்கப்பட்டுள்ளது.
பாஜகவுக்கு எதிராக மதச்சார்பற்ற சக்திகளை அணி திரட்ட வேண்டும்
இந்த தருணத்தில், பாஜகவுக்கு எதிராக அனைத்து மதச்சார்பற்ற சக்திகளையும் பரந்த அளவில் அணிதிரட்ட நாம் பாடுபட வேண்டும். பாஜக ஆளும் மாநிலங்களில் அரசு எந்திரத்தின் உதவியோடும், துணையோடும் இந்துத்துவா அமைப்புகளால் நடத்தப்படும் வகுப்புவாத வன்முறையின் மூலம் சிறுபான்மை மக்கள் துன்புறுத்தப்படுகின்றனர். நிரந்தரமான வகுப்புவாத பிளவை உருவாக்கி இந்துத்துவா ஒருங்கிணைப்பை ஏற்படுத்துவதற்கான உந்துதலின் ஒரு பகுதியே முஸ்லிம் சமூகத்திற்கு எதிரான வற்றாத வன்முறை மற்றும் மிரட்டல் நிலை.
1 சதவீதம் பேர் கைகளில் நாட்டின் 40 சதவீத செல்வம்
புதிய துறைகளை தனியார்மயமாக்க முயல்வது மற்றும் பெரிய ஏகபோகங்களுக்கு லாபத்தை அதிகரிக்க புதிய பகுதிகளை வழங்குகிறது. இதன் விளைவாக, நாட்டின் மொத்தச் செல்வத்தில் 40 சதவீதத்தை மக்கள்தொகையில் ஒரு சதவீதத்தினர் வைத்திருக்கின்றனர். அதிக அளவில் வேலையின்மை உள்ளது. குறிப்பாக இளைஞர்களிடையே ஒப்பந்தம் மூலம் தொழிலாளர் சுரண்டல் அதிகரிக்கிறது. மோசமான விவசாய நெருக்கடியால் விவசாயிகள் மற்றும் விவசாயத் தொழிலாளர்களின் நிலையும் மோசமடைந்துள்ளது.
தொழிலாளர் விரோத சட்டங்களுக்கு எதிராக போராட்டம்
தொழிலாளர்களின் உரிமைகளைக் குறைக்கும் நான்கு தொழிலாளர் சட்டங்களை அமல்படுத்துவதில் அரசாங்கம் முயன்று வருகிறது. இந்த தொழிலாள வர்க்க விரோத சட்டங்களை எதிர்த்து போராட வேண்டும். இந்த நான்கு தொழிலாளர் சட்டங்களை திரும்பப் பெற வலியுறுத்தி மே 20 ஆம் தேதி ஒருநாள் வேலைநிறுத்தத்திற்கு மத்திய தொழிற்சங்கங்கள் அழைப்பு விடுத்துள்ளன. இடதுசாரிக் கட்சிகளும் அனைத்து வர்க்க மற்றும் வெகுஜன அமைப்புகளும் வேலைநிறுத்தத்தை மாபெரும் வெற்றிபெறச் செய்ய வேண்டும்.
ஒரே நாடு - ஒரே தேர்தல்
லோக்சபா மற்றும் சட்டசபைகளுக்கு ஒரே நேரத்தில் தேர்தல் நடத்துவதற்கான அரசியலமைப்பு திருத்த மசோதா, கூட்டாட்சி மற்றும் மாநிலங்களின் உரிமைகள் மீதான நேரடித் தாக்குதலாகும். நாடாளுமன்றத்தை முடக்கவும், உயர் நீதித்துறையை பலவீனப்படுத்தவும், தேர்தல் ஆணையத்தின் சுதந்திரமான அந்தஸ்தை சிதைக்கவும் நடவடிக்கைகள் இன்னும் தொடர்கின்றன.
எதிர்க்கட்சிகளுக்கு எதிராக பயன்படுத்தப்படும் சட்டங்கள்
UAPA என அழைக்கப்படும் தடுப்பு காவல் சட்டம் மற்றும் PMLA என அழைக்கப்படும் சட்டவிரோத பணப் பரிமாற்ற தடுப்புச் சட்டம் போன்ற கொடூரமான சட்டங்கள் எதிர்க்கட்சி தலைவர்களுக்கு எதிராக பயன்படுத்தப்படுகின்றன. சுதந்திர இந்தியாவில் முதல் முறையாக, தேர்ந்தெடுக்கப்பட்ட இரண்டு முதல்வர்கள் ஊழல் குற்றச்சாட்டின் கீழ் சிறையில் அடைக்கப்பட்டனர்.
நிதி ஒதுக்கீட்டில் பாரபட்சம்
பாஜக அல்லாத மாநில அரசுகளுக்கு நிதி ஒதுக்கீடு செய்வதில் அப்பட்டமான பாரபட்சம் உள்ளது. இந்தியாவில் சமூக உறவுகளின் அடிப்படைக் கட்டமைப்பாக சாதி அமைப்பைப் பராமரிக்க பாஜக-ஆர்எஸ்எஸ் கூட்டு துணை சாதி அடையாளங்களைக் கையாளுகிறது. பெண்கள், தலித்கள் மற்றும் ஆதிவாசிகளுக்கு ஆதரவான போராட்டங்களை தீவிரப்படுத்த வேண்டும்.
மத்திய அரசுக்கு எதிராக கேரள அரசு தீவிரம்
மத்திய அரசின் மக்கள் விரோத கொள்கைகளை எதிர்ப்பதில் கேரளாவில் உள்ள எல்டிஎப் அரசு முன்னணியில் உள்ளது. எல்.டி.எஃப் அரசு மாற்றுக் கொள்கைகளை அமல்படுத்த முயன்றதால், மத்திய அரசின் விரோதத்தையும் பாகுபாட்டையும் எதிர்கொள்கிறது. எல்.டி.எஃப் மற்றும் கேரள மக்களின் மாநில உரிமைகள், கூட்டாட்சி மற்றும் சர்வாதிகாரத்திற்கு எதிரான அகில இந்தியப் போராட்டத்தில் ஒரு முக்கிய பகுதியாகும்.
அமெரிக்காவின் ஏகாதிபத்தியத்தை எதிர்க்க வேண்டும்
அமெரிக்க ஏகாதிபத்திய வரலாற்றில் ட்ரம்ப் ஆட்சி ஒரு புதிய அத்தியாயத்தை குறிக்கிறது. ஏகாதிபத்திய ஆக்கிரமிப்பின் மிகவும் அப்பட்டமான வடிவம் இங்கே உள்ளது. காசாவில் இருந்து பாலஸ்தீனியர்களை அழிக்கும் நெதன்யாகுவின் திட்டத்தை டிரம்ப் ஆதரிக்கிறார். உலகளாவிய தெற்கின் பல நாடுகளுக்கு எதிராக டிரம்ப் ஆக்ரோஷமான நடவடிக்கைகளை எடுத்து வருகிறார். இவை அனைத்தையும் மீறி, பிரதமர் மோடி அமைதியாக இருந்து டிரம்பிற்கு தனது விசுவாசத்தை அறிவிக்கிறார்.
இதன் விளைவுகள் நம் நாட்டிற்கு மிக மோசமாக இருக்கும். சுங்க வரிகள், எரிசக்தி பொருட்கள் மற்றும் ராணுவ தளவாடங்கள் வாங்குவதில் இந்தியாவின் முக்கிய நலன்களை மோடி அரசாங்கம் ஏற்கனவே தாரை வார்த்து விட்டது. பாலஸ்தீன மக்களுக்கு இந்த மாநாட்டின் மேடையில் இருந்து முழு ஆதரவையும் முழு ஒற்றுமையையும் தெரிவித்துக் கொள்கிறோம்.
ஆறு தசாப்தங்களுக்கும் மேலாக அமெரிக்க ஏகாதிபத்தியத்தால் திணிக்கப்பட்ட மனிதாபிமானமற்ற பொருளாதாரத் தடையை துணிச்சலுடன் எதிர்த்து வரும் கியூபா மற்றும் கியூப அரசாங்கத்தின் வீரம் மிக்க மக்களையும் நாங்கள் வாழ்த்துகிறோம். இடதுசாரி ஒற்றுமையை வலுப்படுத்தவும், இடதுசாரி அரசியல் தலையீட்டை விரிவுபடுத்தவும் இதுவே நேரம். புதிய தாராளமய முதலாளித்துவத்திற்கு எதிரான ஒரே நிலையான சக்தி மற்றும் உழைக்கும் மக்களின் நலன்களை உறுதியாகப் பாதுகாக்கும் ஒரே சக்தி இடதுசாரிகள்தான்.
இவ்வாறு மார்க்சிஸ்ட் கட்சியின் ஒருங்கிணைப்பாளர் பிரகாஷ் காரத் பேசினார்.
