ஈரானுடனான சாத்தியமான ஒப்பந்தம் குறித்துத் தனது "இறுதி முடிவை" எடுக்கத் தயாராவதாக டொனால்ட் டிரம்ப் அறிவிப்பு!
போர் நிறுத்தத்தை மேலும் 60 நாட்களுக்கு நீட்டிக்கும் வரைவு ஒப்பந்தத்தில் "முன்னேற்றம்" ஏற்பட்டுள்ளதாக அமெரிக்கத் துணை அதிபர் ஜே.டி. வான்ஸ்
மத்தியக் கிழக்கில் போர் நிறுத்தம் மற்றும் சாத்தியமான அமைதி ஒப்பந்தம் குறித்த பேச்சுகள் நடந்து வந்தாலும், களத்தில் பதற்றம் தொடர்ந்து நீடிக்கிறது. அமெரிக்காவிடம் இருந்து வெறும் வாக்குறுதிகளை விட, முறையான "செயல்களை" ஈரான் எதிர்பார்க்கிறது. இது குறித்த முக்கிய நிகழ்வுகளின் தொகுப்பு பின்வருமாறு:
1. அமெரிக்கா - ஈரான் ஒப்பந்தம் குறித்த முரண்பாடுகள்
டிரம்ப்பின் அறிவிப்பு: அமெரிக்க அதிபர் டொனால்ட் டிரம்ப், வெள்ளை மாளிகையின் அதிபாதுகாப்பு அறையில் (Salle de crise) ஆலோசித்துத் தனது இறுதி முடிவை எடுக்க உள்ளதாக 'ட்ரூத் சோஷியல்' (Truth Social) சமூக வலைத்தளத்தில் அறிவித்தார். ஈரானிடம் அணுவாயுதம் இருக்கக் கூடாது, ஹோர்முஸ் நீரிணை (Détroit d'Ormuz) உடனடியாகத் திறக்கப்பட வேண்டும், செறிவூட்டப்பட்ட யுரேனியம் அழிக்கப்பட வேண்டும் என்பன உள்ளிட்ட நிபந்தனைகளை அவர் முன்வைத்தார். தற்போதைக்கு எவ்விதப் பணப் பரிமாற்றமும் இருக்காது எனவும் அவர் கூறினார்.
ஈரானின் திட்டவட்டமான மறுப்பு: டிரம்ப்பின் இந்த அறிவிப்பை ஈரானிய ஊடகங்களும் அதிகாரிகளும் மறுத்துள்ளனர். ஈரானிய வெளியுறவுத்துறை செய்தித் தொடர்பாளர் இஸ்மாயில் பகாய் (Esmaïl Baghaï), "எங்கள் முன்னுரிமை போரை முடிவுக்குக் கொண்டுவருவதே தவிர, அணுசக்தி விவகாரம் தற்போதைய பேச்சுவார்த்தையிலேயே இல்லை" எனத் தெரிவித்துள்ளார். ஹோர்முஸ் நீரிணையை இலவசமாகத் திறப்பது குறித்தோ, யுரேனியத்தை அழிப்பது குறித்தோ எந்த ஒப்பந்தமும் செய்யப்படவில்லை என ஈரான் தரப்பு (Agence Fars) தெரிவித்துள்ளது.
அமெரிக்காவிற்குக் கண்டனம்: அமெரிக்காவின் "அதிகப்படியான" மற்றும் முன்னுக்குப் பின் முரணான கோரிக்கைகள் கைவிடப்பட்டால் மட்டுமே இறுதி ஒப்பந்தம் சாத்தியம் என ஈரானிய வெளியுறவுத்துறை அமைச்சர் அப்பாஸ் அரக்ச்சி (Abbas Araghchi) கூறினார்.
2. ராஜதந்திர நகர்வுகள் மற்றும் எதிர்பார்ப்புகள்
அமெரிக்கா - பாகிஸ்தான் சந்திப்பு: அமெரிக்க வெளியுறவுத்துறை அமைச்சர் மார்கோ ரூபியோ (Marco Rubio), ஈரான் விவகாரத்தில் மத்தியஸ்தம் செய்யும் பாகிஸ்தானின் வெளியுறவுத்துறை அமைச்சரான இஷாக் தாரை (Ishaq Dar) சந்தித்துப் பேசினார்.
செயல்களை எதிர்பார்க்கும் ஈரான்: "நாங்கள் வாக்குறுதிகளை நம்பவில்லை; செயல்களே முக்கியம்" என ஈரானிய நாடாளுமன்ற சபாநாயகர் முகமது பகேர் கலிபாப் (Mohammad Bagher Ghalibaf) 'எக்ஸ்' (X) வலைத்தளத்தில் தெரிவித்தார்.
60 நாள் நீட்டிப்பு: இதற்கிடையே, போர் நிறுத்தத்தை மேலும் 60 நாட்களுக்கு நீட்டிக்கும் வரைவு ஒப்பந்தத்தில் "முன்னேற்றம்" ஏற்பட்டுள்ளதாக அமெரிக்கத் துணை அதிபர் ஜே.டி. வான்ஸ் (J. D. Vance) தெரிவித்துள்ளார். இருப்பினும் டிரம்ப் இன்னும் இதற்கு முறையான ஒப்புதல் அளிக்கவில்லை.
- சிவா சின்னப்பொடி
