பிரிட்டனில் அகதிகளுக்கு சமூக உதவிகள் (Aides Sociales) அதிரடி ரத்து!
சட்டவிரோத குடியேற்றத்தைக் கட்டுப்படுத்தவும், குடியேற்ற அமைப்பைச் சீர்திருத்தவும் பிரதமர் கெய்ர் ஸ்டார்மர் அரசு எடுக்கும் புதிய, பெரிய சீர்திருத்த நடவடிக்கை
பிரிட்டனில் அகதிகளுக்கு சமூக உதவிகள் (Aides Sociales) அதிரடி ரத்து!
பிரிட்டனில் தஞ்சம் கோருவோருக்கான (demandeurs d'asile) விதிகளை அந்நாட்டு அரசு மீண்டும் கடுமையாக்குகிறது. இனி, பிரிட்டனில் தஞ்சம் கோரும் நபர்களுக்குத் தானாகவே கிடைத்து வந்த சமூக நல உதவிகள் (aides sociales) நிறுத்தப்படும் என்று உள்துறை அமைச்சகம் அதிரடியாக அறிவித்துள்ளது.
சட்டவிரோத குடியேற்றத்தைக் கட்டுப்படுத்தவும், குடியேற்ற அமைப்பைச் சீர்திருத்தவும் பிரதமர் கெய்ர் ஸ்டார்மர் அரசு எடுக்கும் புதிய, பெரிய சீர்திருத்த நடவடிக்கைகளின் ஒரு பகுதியே இந்த அறிவிப்பு.
பிரிட்டனின் உள்துறை அமைச்சர் ஷபானா மஹ்மூத் (Shabana Mahmood), இதுகுறித்துப் பேசுகையில்:
"ஐரோப்பாவின் மற்ற நாடுகளில் தஞ்சம் கோரும் விண்ணப்பங்கள் குறைந்திருந்தாலும், பிரிட்டனில் மட்டும் இது தொடர்ந்து அதிகரித்து வருகிறது."
"கடந்த நான்கு ஆண்டுகளில் மட்டும் 400,000 தஞ்சம் கோரும் விண்ணப்பங்கள் வந்துள்ளன."
"இவர்களில் 100,000 பேர் பிரிட்டன் மக்களின் வரிப் பணத்தில் தங்க வைக்கப்பட்டுள்ளனர். இது உள்ளூர் சமூகங்கள்மீது பெரும் சுமையை ஏற்படுத்துகிறது," என்று அவர் விளக்கமளித்தார்.
தொழிலாளர் கட்சி அரசு ஏற்கனவே 20,000 சட்டவிரோத கடல் கடந்த பயணங்களைத் தடுத்திருப்பதாகவும், 50,000 சட்டவிரோத குடியேறிகளைத் திருப்பி அனுப்பியுள்ளதாகவும் அவர் குறிப்பிட்டார்.
"அகதிகள் வருகையைக் கட்டுப்படுத்தும் திட்டத்தின் ஒரு பகுதியாக, தஞ்சம் கோருவோருக்குத் தானாகக் கிடைக்கும் உதவிகள் முடிவுக்குக் கொண்டுவரப்படும்," என்று உள்துறை அமைச்சகம் (Home Office) தனது அறிக்கையில் உறுதி செய்துள்ளது.
இந்தப் புதிய சீர்திருத்தங்கள்பற்றிய முழு விவரங்கள் இன்னும் வெளியிடப்படவில்லை. நாளை திங்கட்கிழமை (நவம்பர் 17) அன்று, அமைச்சர் ஷபானா மஹ்மூத் நாடாளுமன்றத்தில் இந்தத் திட்டத்தை முழுமையாக விளக்குவார் என்று எதிர்பார்க்கப்படுகிறது.
"ஆபத்திலிருந்து தப்பி வருபவர்களைப் பிரிட்டன் தொடர்ந்து வரவேற்கும் ஒரு நாடாகவே இருக்கும். ஆனால், நாட்டில் கட்டுப்பாட்டையும் ஒழுங்கையும் மீட்டெடுப்பது மிக அவசியம்," என்றும் அவர் திட்டவட்டமாகத் தெரிவித்துள்ளார்.
-சிவா சின்னப்பொடி
